YouTube Content Provider
* Blogger * Translator * Traveler

നമ്മുക്കും അന്വേഷിക്കാം ചരിത്രം !

by Julius Manuel
86 പേർ വായിച്ചു
🛑 You are not allowed to use this text content for YouTube Videos without permission 🛑

Ismail Pallipram, Rajeev Pallikkonam , Thoufeek Zakriya തുടങ്ങിയവരെപ്പോലെ സമയവും പണവും വിനിയോഗിച്ച് ആത്മാർത്ഥമായി ചരിത്രമന്വേഷിച്ച് തെരുവീഥികളിലേക്കിറങ്ങുന്നവർ ഇക്കാലത്ത് വളരെക്കുറവാണ് . സാഹചര്യം, സമയം , പണം , റിസ്‌ക്കെടുക്കുവാനുള്ള വിമുഖത ഇതൊക്കെയാണ് പലരെയും താല്പര്യമുണ്ടെങ്കിൽ കൂടി ഇതിലേക്കിറങ്ങിത്തിരിക്കാൻ പിന്തിരിപ്പിക്കുന്ന ഘടകങ്ങൾ . എന്നാൽ ഇതൊക്കെ ചിലവാക്കി ചരിത്രാന്വേഷണത്തിനായി ഇറങ്ങിതിരിച്ചവർക്ക് അഭിമുഖീകരിക്കേണ്ട ഒട്ടനവധി പ്രശ്‍നങ്ങൾ നിലവിലുണ്ട് . അതിലൊന്നാണ് പുരാവസ്തുക്കളുടെ കള്ളക്കടത്ത് . ഒരു വസ്തുവോ , സ്ഥലമോ , കെട്ടിടമോ ചരിത്രപ്രാധാന്യമുള്ളത് എന്ന് ഒരു ഗവേഷകൻ കണ്ടെത്തിയാൽ അന്ന് മുതൽ അതിന്റെ നാശവും ആരംഭിക്കും . പുരാവസ്തുക്കൾക്ക് ആഗോള വിപണിയിൽ കിട്ടിയേക്കാവുന്ന വൻവിലകളാണ് ഇത്തരം സ്ഥലങ്ങൾ കൊള്ളയടിക്കുവാൻ ആളുകളെ പ്രേരിപ്പിക്കുന്നത് . അടുത്ത പ്രശ്‌നം ഇത്തരം ചില സ്ഥലങ്ങൾ തിരിച്ചറിയുക എന്നതും അവിടെ എത്തിച്ചേരലും ആണ് . പലതും അപ്രാപ്യമായ വനങ്ങളിലും അല്ലെങ്കിൽ പട്ടണമധ്യത്തിൽ ഒരു സ്വകാര്യ ഭൂമിയിലും ആകാം . രണ്ടും ഒരു സാധാരണ അന്വേഷിയെ സംബന്ധിച്ചിടത്തോളം അസാധ്യം തന്നെ . അടുത്ത പ്രശ്‌നം ചരിത്രാന്വേഷികളുടെ ഏകോപനവും ആശയങ്ങൾ പങ്കുവെയ്ക്കലും ആണ് . ഒരേ സ്ഥലത്തെപ്പറ്റി പല ഗവേഷകർക്കും ഭിന്നാഭിപ്രായങ്ങൾ ഉണ്ടാവാം . അതെല്ലാം ഒരു സിംഗിൾ പ്ലാറ്റ്‌ഫോമിൽ ചർച്ചചെയ്യുകയും കിട്ടിയ വിവരങ്ങൾ പങ്കുവെക്കുകയും ചെയ്‌താൽ സമയ ലാഭവും , കിട്ടിയ ഡേറ്റകളുടെ ആധികാര്യത വർദ്ധിപ്പിക്കലും ഒരേ സമയം നടക്കും .

നാമിപ്പോൾ കണ്ട സകല പ്രശനങ്ങൾക്കും ഒറ്റയടിക്ക് പരിഹാരം കണ്ടെത്തിയിരിക്കുകയാണ് നാഷണൽ ജ്യോഗ്രഫിക് പ്രവർത്തകയായ ഡോക്ടർ സാറാ (Dr. Sarah Parcak). സിറ്റിസൺ ജേർണലിസത്തിനു സമാനമായി citizen explorers എന്ന ആശയമാണ് സാറാ കഴിഞ്ഞവർഷം നമ്മുക്ക് മുന്നിൽ അവതരിപ്പിച്ചത് . ആഗ്രഹമുള്ള ആർക്കും ഭൂമിയിലെവിടെയുമിരുന്നുകൊണ്ട് ചരിത്രഗവേഷകനാകാനുള്ള സുവർണ്ണാവസരം ! മനുഷ്യനപ്രാപ്യമായ ഭൂമിയിലെ ഒട്ടുമിക്ക സ്ഥലങ്ങളിലും ആരുമറിയാതെ കടന്നു ചെല്ലുന്ന ഒരാളുണ്ട് . ഭൂമിക്കു ചുറ്റും വലംവെയ്ക്കുന്ന കൃതിമ ഉപഗ്രഹങ്ങളുടെ ക്യാമെറാ കണ്ണുകൾ ! ഒരു സിറ്റിസൺ എക്സ്പ്ലോറർക്ക് റോ ഡേറ്റയായി സാറാ നൽകുന്നത് സാറ്റലൈറ്റുകൾ ഒപ്പിയെടുത്ത ലക്ഷക്കണക്കിന് ചിത്രങ്ങളും അവയുടെ ടൈലുകളുമാണ് . വിവരസാങ്കേതിക സങ്കേതങ്ങളുടെ യാതൊരു പരിചയവുമില്ലാത്ത ഏതൊരാളെയും പരിശീലിപ്പിച്ച് നല്ലൊരു ചരിത്രാന്വേഷിയാക്കാൻ ഇവർ രൂപകൽപ്പന ചെയ്ത www.globalxplorer.org എന്ന വെബ് സൈറ്റിന് സാധിക്കും . ഒരു പക്ഷി ഭൂമിയെ കാണുന്നതുപോലെയുള്ള ഉപഗ്രഹ ചിത്രങ്ങളിൽ നിന്നും . ചരിത്ര പ്രാധാന്യമുള്ള സ്ഥലമേത് , പ്രകൃതി നിർമ്മിതിയേത് , മനുഷ്യ നിർമ്മിതിയേത് , ഇനി നമ്മുക്ക് മുൻപേ ആരെങ്കിലും അവിടെ മണ്ണ് കുഴിക്കൽ തുടങ്ങിയോ , ചിത്രത്തിന്റെ കളർ വേരിയേഷനിൽ നിന്നും കുന്ന് , കുഴി , സസ്യങ്ങൾ ഇവ കണ്ടറിയൽ എന്നീകാര്യങ്ങളൊക്കെ തിരിച്ചറിയാകാൻ പാകത്തിൽ നല്ലൊരു പരിശീലന സംവിധാനം ഈ സൈറ്റ് ഒരുക്കിയിട്ടുണ്ട് . രെജിസ്റ്റർ ചെയ്യുന്ന ഏതൊരാളും ഈ പരിശീലന മുറകളിലൂടെ കടന്നു പോകേണ്ടതുണ്ട് . അത് വളരെ എളുപ്പമുള്ള കാര്യമാണ് താനും . പരിശീലനം കഴിയുന്നതുവരെയും നാം Wanderer എന്ന പദവിയിൽ ആയിരിക്കും . ഉപഗ്രഹചിത്രങ്ങളിൽ നിന്നും ചില ചോദ്യങ്ങൾ ചോദിച്ച് നാം അടുത്ത ലെവലിൽ പ്രവേശിക്കുവാൻ പ്രാപ്തനായോ എന്ന് പരിശോധിക്കും . അത് വിജയകരമായി പൂർത്തിയാക്കിയാൽ അടുത്ത ഘട്ടം Pathfinder എന്ന നിലയിൽ ആയിരിക്കും . ഇവിടെയെത്തിയാൽ ഇപ്പോൾ നടക്കുന്ന ഒരു വമ്പൻ പ്രൊജക്റ്റിൽ അംഗമാകാനുള്ള അവസരമാണ് നമ്മെ കാത്തിരിക്കുന്നത് . “Expedition Peru” എന്ന പ്രോജക്റ്റ് ഏപ്രിൽ പതിനാറിന് ഔദ്യോഗികമായി അവസാനിച്ചെങ്കിലും അന്ന് ഉപഗ്രഹചിത്രങ്ങളിൽ നിന്നും ശേഖരിച്ച വിവരങ്ങൾ ആളുകളുടെ അപര്യാപ്തത കാരണം പൂർണ്ണമായും അവലോകനം ചെയ്ത് കഴിഞ്ഞിട്ടില്ല . പെറുവിലെ പതിനായിരക്കണക്കിന് ഉപഗ്രഹ ചിതങ്ങളിൽ നിന്നും പതിനേഴോളം പുതിയ പിരമിഡുകളാണ് സാറയുടെ സിറ്റിസൺ ചരിത്രാന്വേഷികൾ പൊടിതട്ടിയെടുത്തത് ! ഇതുകൂടാതെ ഈജിപ്തിൽ നിന്നും ആയിരത്തോളം ശവക്കല്ലറകളും , മറ്റു സഥലങ്ങളിൽ നിന്നും മൂവായിരത്തിൽപരം പഴയകാല നിർമ്മിതികളും ഇവർ കണ്ടെത്തിക്കഴിഞ്ഞു ! കൂടുതൽ കണ്ടുപിടുത്തങ്ങളും പങ്കാളിത്തവും നമ്മുടെ പദവി ഉയർത്താൻ സഹായിക്കും . ആളുകളെ കൂടുതൽ എൻഗേജ് ചെയ്യിപ്പിക്കുവാനാണ് ഈ “പദവി ” കൊടുക്കലുകൊണ്ട് സാറാ ഉദ്യേശിക്കുന്നത് . ഭാവിയിൽ ഭൂമിയിലെ മറ്റു സ്ഥലങ്ങളിലെയും പ്രോജക്റ്റുകൾ ആരംഭിക്കുവാൻ ഇവർക്ക് പദ്ധതിയുണ്ട് .

ചരിത്രാന്വേഷികൾ എന്ന നിലയിൽ നിന്നും സ്പേസ് എക്സ്പ്ലോറേഴ്സ് എന്ന ആധുനിക ഗവേഷക കൂട്ടായ്മ്മയിലേക്കു നമ്മെപ്പോലെയുള്ള സാധാരണക്കാരെ ഉയർത്തിക്കൊണ്ട് വരിക എന്ന പ്രാഥമിക ഉദ്യേശത്തിനോടൊപ്പം ” ഭാവിയുടെ ചരിത്രത്തെ ” കണ്ടുപിടിക്കുക എന്ന ഉത്തരവാദിത്വ൦ നിറവേറ്റാൻ നമ്മെ പ്രാപ്തരാക്കുകയും ചെയ്യാൻ സാറയുടെ ഈ ഉദ്യമത്തിന് കഴിയും എന്നാണ് കരുതപ്പെടുന്നത് . അമേരിക്കയിലെ പല സ്‌കൂളുകളും കുട്ടികളുടെ പ്രൊജക്റ്റിൽ ഇതും ഉൾപ്പെടുത്തുവാൻ തുടങ്ങിക്കഴിഞ്ഞു . നമ്മുടെ സ്‌കൂളുകളിലും ഇത് എളുപ്പം സാധിക്കാവുന്നതേ ഉള്ളൂ . ഒരു ഗെയിം കളിക്കുന്നതുപോലെ ലെവലുകൾ തണ്ടു മുന്നേറാവുന്ന ചരിത്രാന്വേഷണം കുട്ടികൾക്ക് എളുപ്പം ബോധിക്കും എന്ന് പഠനങ്ങൾ തെളിയിക്കുന്നു . ഇത് വായിക്കുന്ന അധ്യാപകർ ഒട്ടും താമസിക്കാതെ തന്നെ ഇക്കാര്യം പരിഗണിക്കും എന്ന് കരുതട്ടെ .
https://www.globalxplorer.org/ എന്നതാണ് വിലാസം

🛑 You are not allowed to use this text content for YouTube Videos without permission 🛑

Leave a Comment

This site uses Akismet to reduce spam. Learn how your comment data is processed.

MORE POSTS

This website uses cookies to improve your experience. We'll assume you're ok with this, but you can opt-out if you wish. Accept Read More