YouTube Content Provider
* Blogger * Translator * Traveler

Starlight Tourism

by Julius Manuel
36 പേർ വായിച്ചു
🛑 You are not allowed to use this text content for YouTube Videos without permission 🛑

താഴോട്ട് വായിക്കാനുള്ള രസത്തിന് ആദ്യമേതന്നെ പറയാം …. ചിത്രത്തിൽ ഉള്ളത് ചന്ദ്രനുമല്ല, സൂര്യനുമല്ല ; ശുക്രനാണ് !

കഴിഞ്ഞ ദിവസം( 12 Feb 2018)  ഒരു റെഡ് ഇന്ത്യൻ വനിതയുമായി സംവദിച്ചുകൊണ്ടിരുന്നപ്പോൾ ( അവർ അടുത്തുവന്നപ്പോൾ മുതൽ ഞാൻ മൊബൈലിൽ കുത്തിക്കൊണ്ടൊരിക്കുകയായിരുന്നു ) ആ സ്ത്രീ എന്നോടൊരു ചോദ്യം ചോദിച്ചു . നിങ്ങളെന്നാണ് ഒന്ന് മുകളിലേക്ക് നോക്കുക ? ഒരൽപ്പം നീരസത്തോടെ ഞാൻ ചോദിച്ചു , നിങ്ങളെന്താണ് ഉദ്യേശിക്കുന്നത് ? അവർ പറഞ്ഞു തുടങ്ങി …. നിനക്കറിയാമോ ഞാൻ ഹവായി ദ്വീപുകളിലാണ് ജനിച്ചു വളർന്നത് . കുന്നുകളും , അരുവികളും , പഴങ്ങളും , നല്ല സുന്ദരൻ മഴയും ! … അവരുടെ മുഖം വിടർന്നു .. കണ്ണുകൾ തിളങ്ങി . ഞങ്ങളുടെ പാരമ്പര്യമനുസരിച്ച് ഒരേ കുടുംബക്കാർ ഒരുമിച്ച് ഒരേ ഗ്രാമത്തിലാണ് താമസിക്കുക . എന്ന് വെച്ചാൽ ഒരു ഗ്രാമത്തിൽ ഒരു കുടുബക്കാർ മാത്രമേ കാണൂ . രാത്രിയാകുമ്പോഴാണ് രസം . വലിയൊരു തീക്കുണ്ഡമുണ്ടാക്കി ഞങ്ങളെല്ലാവരും അതിനു ചുറ്റും കൂടും . ആദ്യമേ പാട്ടുകളും ഡാൻസുമൊക്കെയാണ് . പിന്നെ പിന്നെ തീയണഞ്ഞു തുടങ്ങും . അവസാനം ഇരുട്ട് ! പിന്നെ പതുക്കെ നമ്മുടെ കണ്ണുകൾ നിലാവെളിച്ചത്തിൽ കണ്ടു തുടങ്ങും . അപ്പോൾ പ്രായമുള്ളവർ സംസാരിച്ചു തുടങ്ങും . പഴയ കഥകളും ചരിത്രവും പാരമ്പര്യവുമൊക്കെ . അപ്പോഴൊക്കെ അവർ പറയുന്ന ഒരു കാര്യമുണ്ട് . ഈ ഇരുട്ടിൽ നമ്മുക്ക് അങ്ങോട്ടും ഇങ്ങോട്ടും കാണാനാവില്ല , പക്ഷെ മുകളിലേക്ക് നോക്കൂ നമുക്കീ പ്രപഞ്ചം മുഴുവനും കാണാം ! കാരണവർമ്മാർ ഞങ്ങൾ കുട്ടികളെ അടുത്തുള്ള കുന്നിലേക്ക് കൂട്ടിക്കൊണ്ട് പോകും , എന്നിട്ട് ആകാശം കാണിച്ചുതരും . അവർക്കറിയാവുന്ന നക്ഷത്രങ്ങളും മറ്റും നമ്മെ ചൂണ്ടിക്കാണിക്കും . എന്നിട്ട് പറയും , ഞങ്ങൾ പകൽ മുഴുവനും കടലിൽ കഴിയുമായിരുന്നു . മീൻപിടുത്തവും , ദ്വീപുകളിലെ ആടുകൃഷിയും . രാത്രിയായാൽ ഇതുപോലെ ഏതെങ്കിലും കുന്നിൻചെരുവിൽ ആകാശം കണ്ട് കഥകൾ പറഞ്ഞു കിടക്കും .

സ്ത്രീ തുടർന്നു . നിനക്കറിയുമോ വെളിച്ചം അധികമായാൽ അതൊരു ട്രാപ്പാണ് . പകൽ വെളിച്ചത്തിൽ നാം നമ്മുടെ ജീവിതവും മറ്റുള്ളവരുടെ ജീവിതവും കണ്ട് ജീവിതചക്രത്തിൽ കിടന്ന് കറങ്ങും . നിനക്കാവിശ്യമുള്ളതിനേക്കാൾ കൂടുതൽ ആവശ്യമില്ലാത്തതാണ് കാണുന്നത് . എന്നാൽ രാത്രിയിൽ നീയൊന്നു മുകളിലേക്ക് നോക്കൂ . ബൾബുകളുടെ വെളിച്ചത്തിൽ നിനക്കൊന്നും കാണാനാവില്ല , ഇതൊന്നുമില്ലാത്തിടത്ത് പോകാനാവുമോ ? പക്ഷെ പോയാൽ നിന്റെ ജീവിതം മാറും നീ ലോകം കാണും , ആകാശവും ! ഓർക്കുക നമ്മുടെ ഭൂമിയിൽ ഏറ്റവും കൂടുതൽ ഉള്ളത് ആകാശവും പിന്നെ കടലുമാണ് . ഇത് രണ്ടും നിനക്കാസ്വദിക്കാനായില്ലെങ്കിൽ ഒരിക്കലും ഇത് രണ്ടും കാണാത്ത പന്നിക്ക് സമാനമാണ് നാമൊക്കെ ! ഇനി പറ .. നീയെന്നാണ് മുകളിലേക്ക് നോക്കുക ? ഇത്രയും പ്രസ്താവിച്ച് അവർ നടന്നകന്നു .” വെളിച്ചം ദുഖമാണുണ്ണീ തമസ്സല്ലോ സുഖപ്രദം ” !!! ഞാൻ ഓർത്തു .

മൈലുകൾ അകലെ വാസ്കോഡഗാമയുടെ പോർട്ടുഗൽ രാജ്യം . തലസ്ഥാനമായ ലിസ്ബണിൽ നിന്നും രണ്ടുമണിക്കൂർ ഡ്രൈവ് ചെയ്‌താൽ Algarve എന്നൊരു സുന്ദരൻ ഗ്രാമത്തിലെത്തിച്ചേരും . Alqueva തടകാതീരത്താണ് ഇത് സ്ഥിതിചെയ്യുന്നത് . വർഷത്തിൽ 286 ദിവസങ്ങളും തെളിഞ്ഞ ആകാശമുള്ള ഈ സ്ഥലം ഇന്ന് ലോക ടൂറിസം ഭൂപടത്തിൽ പ്രത്യകസ്ഥാനം കൈവരിച്ചുകഴിഞ്ഞു . കുന്നും , മലയും കാണാനല്ല ആളുകൾ ഇവിടെ എത്തുന്നത് , മറിച്ച് ആകാശം കാണാനാണ് ! ലോകത്തിൽ ആദ്യമായി Starlight ടൂറിസം നടപ്പാക്കിയ സ്ഥലമാണ് Algarve .

UNESCO, UNWTO , IAC തുടങ്ങിയ സംഘടനകളുടെ പിന്തുണയോടെ Starlight Foundation ആണ് Starlight Tourism Destination എന്ന പദവി ഒരു സ്ഥലത്തിന് നൽകുന്നത് . അന്തരീക്ഷ ഘടന, പ്രകാശമലിനീകരണ തോത് , വർഷത്തിൽ കിട്ടാവുന്ന തെളിഞ്ഞ രാത്രികളുടെ എണ്ണം, ടൂറിസ്റ്റുകൾക്ക് എത്തിച്ചേരാനുള്ള എളുപ്പം തുടങ്ങിയ കാര്യങ്ങൾ പരിശോധിച്ച ശേഷമാണ് ഈ പദവിക്ക് ഒരു സ്ഥലം അർഹമാകുക . കൂടാതെ Dark Sky Reserve എന്ന പദവിയും കൂടി അൾഗാർ ഗ്രാമത്തിന് ലഭിച്ചിട്ടുണ്ട് . വാനനിരീക്ഷണം പ്രോത്സാഹിപ്പിക്കാൻ International Dark-Sky Association (IDA) എന്ന സംഘടനയാണ് ഈ പദവി കൊടുക്കുന്നത് . 52 ഡിഗ്രി സൗത്ത് ഡിക്ലൈനേഷൻ വരെയുള്ള ആകാശകാഴ്ചകൾ ഇവിടെ നമ്മുക്ക് നിരീക്ഷിക്കാനാവും . രാത്രിയാണ് അൾഗാർ ഉണരുക . തെളിഞ്ഞ ആകാശകാഴ്ചകൾ നമ്മെ പരിചയപ്പെടുത്താൻ ഗൈഡുകൾ തയ്യാറായി നിൽപ്പുണ്ടാവും . സൂപ്പർ മൂൺ തുടങ്ങിയ ദിവസങ്ങളിൽ പ്രത്യേക ക്യാംപുകൾ ഉണ്ടാവും(Dark Sky Party) . കുതിരപ്പുറത്തും തടാകത്തിലൂടെ ചെറുവള്ളങ്ങളിലും (night-canoeing) നമ്മുക്ക് വാനനിരീക്ഷണം നടത്താം . ഇതെല്ലാം കഴിഞ്ഞു ഒരു ചെറു രാത്രിസവാരിയും (stargazing walks) കൂടി ചെയ്താണ് സന്ദർശകർ വെളുപ്പിനെ ഹോട്ടലുകളിലേക്ക് മടങ്ങുന്നത് . മെയ് , ജൂൺ , ജൂലായ് മാസങ്ങളിലാണ് ആക്ഷാശഗംഗ ഏറ്റവും വ്യക്തമായി ഇവിടെ പ്രത്യക്ഷപ്പെടുന്നത് .

എന്നാൽ ഇതിന്റെയെല്ലാം പിറകിൽ നടന്നുപോരുന്ന മറ്റൊരു പ്രഫഷണൽ വർക്കുണ്ട്, Astrophotography . പോർട്ടുഗൽ സ്വദേശിയായ Miguel Claro ആണ് ഈ ഫോട്ടോഗ്രാഫി മേഖലയിലെ മിശിഹാ . അദ്ദേഹം കൂടി മുൻകൈ എടുത്താണ് Algarve റിസർവ് രൂപകൽപ്പന ചെയ്തത് തന്നെ . വാനനിരീക്ഷണവും , ആസ്ട്രോഫോട്ടോഗ്രാഫിയും പ്രോത്സാഹിപ്പിക്കുവാൻ എന്ത് കടന്നകയ്യും ചെയ്യാൻ തായാറാണ് ഇദ്ദേഹം . Skyscapes രീതിയിലാണ് ഇദ്ദേഹം ഫോട്ടോകൾ എടുക്കുക . അതായത് മലകളുടെയോ , തടാകങ്ങളുടെയോ , മരങ്ങളുടെയോ , മൃഗങ്ങളുടെയോ ചിത്രങ്ങളുടെ പിറകിലായി ആകാശകാഴ്ചകൾ ചിത്രീകരിക്കുകയാണ് അദ്ദേഹത്തിന്റെ ശൈലി . ഇന്ന് നാം നെറ്റിൽ കാണുന്ന ഒട്ടുമിക്ക സ്കൈസ്കേപ്പ് ചിത്രങ്ങളും മിഗ്വെൽ ക്ലാരോയുടെ സംഭാവനയാണ് . Dark Sky Alqueva Reserve ന്റെ ഔദ്യോഗിക ഫോട്ടോഗ്രാഫറാണ് ഇദ്ദേഹം . www.miguelclaro.com എന്ന സൈറ്റിലുള്ള അദ്ദേഹത്തിന്റെ ചിത്രങ്ങൾ നമ്മുടെ കണ്ണുകൾക്ക് നല്ലൊരു ഇരയാണ് .
മുകളിൽക്കാണുന്ന വീനസ് ഗ്രഹത്തിന്റെ ചിത്രവും അതിന്റെ ജലത്തിലെ പ്രതിഫലനവും വടക്കൻ അയർലണ്ടിലെ Causeway തീരത്തുനിന്നും മിഗ്വെൽ ക്ലാരോ പകർത്തിയതാണ് .

[contentcards url=”www.miguelclaro.com ” target=”_blank”]

മനുഷ്യന്റെ ഒരു പൊതു സ്വഭാവമനുസരിച്ച് എന്നോട്; നീയെന്നാണ് മുകളിലേക്ക് നോക്കുക എന്ന് ആക്രോശിച്ച ഹവായിയൻ തള്ളയുടെ നാട്ടിൽ ഇത്തരം വല്ല സെറ്റപ്പും ഉണ്ടോ എന്ന് ഞാൻ നെറ്റിലൊന്ന് തപ്പി . രാത്രിയിൽ കടൽക്കരയിൽ മാനത്തോട്ട് നോക്കിയിരിക്കുന്ന ജനവർഗ്ഗമുള്ള നാടല്ലേ , അങ്ങിനെ ഒരെണ്ണം കാണണമല്ലോ ഹും . ഇല്ലെങ്കിൽ തള്ള വരുമ്പോൾ അതുംപറഞ്ഞു പൊളിക്കാം ( മലയാളീഡാ !). പക്ഷെ സംഭവം പൊളിഞ്ഞു . ഹവായി ദ്വീപുകളിലെ Big Island എന്ന ഒരു ദ്വീപുമുഴുവനും പഹയന്മാർ ഇതിനായി നീക്കിവെച്ചിരിക്കുകയാണ് !

===========================================

അങ്ങിനെ ഫേസ്ബുക്കിൽ രാത്രി ആകാശത്തോട്ട് വായുംപൊളിച്ചിരിക്കേണ്ട ആവശ്യകതെയെപ്പറ്റി നല്ലൊരു പോസ്റ്റും ഇട്ട് ഞാൻ വെളിയിലേക്കിറങ്ങി . ഏഭ്യൻമ്മാർ ! അയൽവക്കത്തുള്ളവർ മുഴുവനും വെളിയിൽ ലൈറ്റ് ഇട്ടിരിക്കുകയാണ് . മുടിഞ്ഞ ലൈറ്റ് പൊലൂഷൻ ! എങ്കിലും കഷ്ട്ടപ്പെട്ടു മുകളിലേക്കൊന്ന് നോക്കി . നല്ല വിശാലമായ ആകാശം . പക്ഷെ വിചാരിച്ചപോലെയല്ല . നിറയെ ചുവന്ന ബൾബുകൾ തലങ്ങും വിലങ്ങും നീങ്ങുന്നു . ഒരു വശത്ത് മയാമി അന്താരാഷ്ട്ര വിമാനത്താവളം , മറുവശത്ത് ഫോർട്ട് ലോഡർഡെയിൽ അന്താരാഷ്ട്ര വിമാനത്താവളം, നേരെ മുൻപിൽ വിമാന പരിശീലന കേന്ദ്രം , അതിനും പിറകിൽ മിലിട്ടറി ബേസ് . ആകാശത്ത് വിമാനമേതാ , പറക്കും തളികയേതാ എന്ന് പോലും തിരിച്ചറിയാനാവാത്ത അവസ്ഥ ! തൊണ്ണൂറാം വയസിലും നട്ടപ്പാതിരയ്ക്ക് എക്സർസയ്‌സ് ചെയ്യുന്ന അയൽവക്കത്തെ മദാമതള്ളക്കു ഗുഡ് നൈറ്റ് പറഞ്ഞുകൊണ്ട് ജൂലിയസ് മാനുവൽ സൈനിങ്‌ ഓഫ് .

🛑 You are not allowed to use this text content for YouTube Videos without permission 🛑

Leave a Comment

This site uses Akismet to reduce spam. Learn how your comment data is processed.

MORE POSTS

This website uses cookies to improve your experience. We'll assume you're ok with this, but you can opt-out if you wish. Accept Read More