ആ പാദങ്ങൾ ……

ആ പാദങ്ങൾ ...... 1

കട്ടൻകാപ്പിയും കുടിച്ച് രാവിലെ എട്ടുമണിയോടെ അവൻ വീട്ടിൽ നിന്നിറങ്ങും .  ചുവന്ന ബൈക്കിലിരുന്ന് പോകുന്ന ആ ചെറുപ്പക്കാരനെ  നാട്ടുകാർക്കെല്ലാം അറിയാം . പൊടിമീശയും വെച്ച് പെട്രോൾ ടാങ്കിന് മുകളിൽ രണ്ട് ബുക്കുകളും തിരുകി സാവധാനം പള്ളിയുടെ മുൻപിലൂടെ വണ്ടിയോടിക്കുന്ന അവൻ തന്റെ നാടുകഴിയുന്ന ആ നിമിഷം വണ്ടിയുടെ വേഗത ഇരട്ടിപ്പിക്കും . വീട്ടിൽ നിന്നിറങ്ങുമ്പോൾ തലയിലുണ്ടായിരുന്ന  കറുത്ത ഹെൽമറ്റ്  ആ സമയം മുന്നിലെ റിയർവ്യൂ മിററിന്റെ കമ്പിയിൽ കിടന്ന് നട്ടംതിരിയുന്നുണ്ടാവും . പട്ടണത്തിലേക്ക് പോകുന്ന പ്രധാന റോഡിലേക്കുള്ള കവലയിൽ മാത്രം വണ്ടി ചെറുതായൊന്ന് വേഗതകുറയ്ക്കും . പിന്നെ മിന്നല് പോലൊരു പോക്കാണ് .  സർക്കാര് വക കോളേജിലെത്താതെ ആ ഇരുചക്രവാഹനം നിൽക്കില്ല . നേരെ പ്രസാദ് ചേട്ടന്റെ കടയിലേക്കാണ് വണ്ടിയുരുണ്ടുചെല്ലുക . അവിടെയാണ് സംഘം ചേരൽ . ഒന്നോ രണ്ടോ ക്ലാസുകളിൽ കയറും . അല്ലെങ്കിൽ എവിടെങ്കിലും കറങ്ങാൻ പോകും . രാത്രിയിൽ കുരിശുവരയ്ക്കു മുന്നേ വീട്ടിൽ ഹാജർ .അവന്റെ  മൂന്നുവർഷത്തെ ബിരുന്ദപഠനം ഇങ്ങനെയൊക്കെത്തന്നെയാണ് മുന്നോട്ട് പോയത് . ഈ യാത്രകളിക്കിടയിൽ സ്ഥിരമായൊരാൾ അവന്റെ ബൈക്കിന് പിറകിൽ ഉണ്ടായിരുന്നു ,  അജീഷ്.  തടിയൻ കയറിയിരുന്നാൽ ഇന്ധനം ഇരട്ടി ചിലവാകും .   പക്ഷെ സുഹൃത്താണ് , സഹപാഠിയാണ് നാട്ടുകാരനും  കൂടെയാണ് . അജീഷില്ലാതെ വണ്ടിയോടിച്ചാൽ പിറകിലൊരു ശൂന്യതയായിരുന്നു അവന് .

Advertisements

പക്ഷെ അന്നൊരു ദിവസം അജീഷ് വന്നില്ല . അതുകൊണ്ട് തന്നെ അവന്റെ വണ്ടി അന്ന് സാവധാനമാണ് പോയത് . കവലയിലെത്തി . അറിയാതെ വണ്ടി ചവുട്ടി നിർത്തി . ഇന്ന് പോകണമോ എന്നായിരുന്നു അവന്റെ ചിന്ത . പെട്ടന്ന് മിന്നലുപോലൊരു വാഹനം മുന്നിലൂടെ കടന്നു പോയി . സ്‌കൂട്ടി പോലെന്തോ ഒരു വണ്ടി . ഒരു പെണ്ണാണെന്ന് മനസിലായി .  അവന്റെ വണ്ടിയും പതുക്കെ മുന്നോട്ടുരുണ്ടു . അവളെ മറികടക്കാനായി വലത്തേക്ക് വെട്ടിച്ചപ്പോൾ മിന്നായം പോലെ അവളുടെ കാലുകൾ അവൻ കണ്ടു . നല്ല സുന്ദരമായ വൃത്തിയുള്ള പാദങ്ങൾ  ! അവൻ മുഖത്തേക്കു നോക്കിയതേയില്ല . ആ കാലുകൾ തന്നെ നോക്കിക്കൊണ്ട് അവളെ മറികടന്നു പോയി . വലതുവശത്തെ കണ്ണാടി അങ്ങോട്ടും ഇങ്ങോട്ടും വെട്ടിച്ച് അവളുടെ മുഖമൊന്ന് കാണാൻ അവൻ ശ്രമിച്ചു . ഹെൽമെറ്റുണ്ട് . കൂടാതെ കാറ്റടിക്കാതിരിക്കുവാൻ ഷാളുകൊണ്ട് വായ് മൂടിയിരിക്കുന്നു . അവൻ വേഗതകൂട്ടി കടന്നുപോയി . പക്ഷെ ആ വെളുത്ത് ഉരുണ്ട പാദങ്ങൾ അവന്റെ മനസ്സിൽ നിന്നും പോയില്ല . അടുത്ത ദിവസ്സം അജീഷ് കൂടെയുണ്ടായിരുന്നു . പതിവില്ലാതെ കവലയിൽ ചവുട്ടിനിർത്തിയത് കണ്ട് അവൻ ദേഷ്യപ്പെട്ടു . സമയം പോയിരിക്കുന്നു . പക്ഷെ അവൻ ഇടവും വലവും  നോക്കി ഒരു രണ്ടുമിനിറ്റ് ഒന്നും മിണ്ടാതെ വണ്ട് ചവുട്ടി നിർത്തി അതേപടി അവിടെ നിന്നു . പിന്നെ മനസില്ലാമനസോടെ  വണ്ടിയെടുത്തു . ഒച്ചിഴയുന്നതുപോലുള്ള ആ  ഡ്രൈവിങ് കണ്ട് അജീഷ് അത്ഭുതപ്പെട്ടു . പൊടുന്നനെ കണ്ണാടിയിൽ വീണ്ടും ആ രൂപം പ്രത്യക്ഷപ്പെട്ടു ! അവൻ പതുക്കെ ബൈക്ക് ഇടത്തേക്ക് തിരിച്ചു . അവളുടെ വണ്ടി സാവധാനം  മുന്നോട്ടു കയറി വന്നു . മുഖത്ത് നോക്കാതെ വീണ്ടും പാദങ്ങളിലേക്കാണ് അവന്റെ കണ്ണുകൾ പാഞ്ഞത് . വേറെ ചെരുപ്പാണ് . നഖങ്ങളിൽ നിറങ്ങൾ പുരണ്ടിരിക്കുന്നു . താളത്തിനൊത്ത് ചലിപ്പിക്കുമാറ് വിരലുകൾ അനങ്ങുന്നുണ്ട് . കണ്ണുകൾ പതുക്കെ അവളുടെ  മുഖത്തേക്ക് സഞ്ചരിച്ചു . പെട്ടന്ന് അവൾ തലവെട്ടിച്ച് ഒന്ന് നോക്കി . ചിരിക്കുകയായിരുന്നോ ? എന്തായിരുന്നു ആ മുഖഭാവം ? ഒന്നും വ്യക്തമല്ല . പക്ഷെ അവൾ തന്നെയും ശ്രദ്ധിച്ചു എന്നവന് മനസിലായി . അവൾ പെട്ടന്ന് മറികടന്ന് പോയി . കൂടെ ഒന്ന് രണ്ട് വേറെ വണ്ടികളും .

അവൾ തന്നെ ശ്രദ്ധിച്ചു എന്ന തോന്നൽ അവനിൽ ആവേശമുയർത്തി . രാത്രിമുഴുവനും അവളുടെ ഭാവം എന്തായിരുന്നു എന്ന് ചിന്തിച്ച് ചിന്തിച്ച് അവന് ഉറക്കം വന്നതേയില്ല . എട്ട് പതിനഞ്ച് , അതാണ് സമയം . അവൾ ആ വഴി വരുന്ന സമയം !  അന്നാദ്യമായി അവൻ  കണ്ണാടിയുടെ മുൻപിൽ കുറച്ചുസമയം ചിലവഴിച്ചു . ഏത് ഷർട്ടാണ് തനിക്കു ചേരുന്നത് എന്ന് അമ്മയോട് ചോദിച്ചത് വീട്ടിലെല്ലാർക്കും വലിയ ചിരിയുളവാക്കി . ” എന്നാടാ ” എന്ന അപ്പന്റെ ചോദ്യത്തിലെ എല്ലാ അക്ഷരങ്ങൾക്കുമിടയിൽ അസാധാരണ നീളമുണ്ടായിരുന്നു . ആവേശത്തോടെ കാല് കവച്ച് ബൈക്കിൽ ഇരുന്നപ്പോൾ പക്ഷെ മുഖം വാടി . അജീഷ് ! . എങ്ങിനെ ഇവനെ ഒഴിവാക്കാം എന്നായി ചിന്ത . ഉം വഴിയുണ്ട് . അവന്റെ കുബുദ്ധി പ്രവർത്തിച്ചു തുടങ്ങി .  വണ്ടി നേരെ അജീഷിന്റെ വീടിന് മുന്നിലേയ്ക്കുരുണ്ടു . “എടാ ഞാൻ മറന്ന് പോയി , ഇന്നൊരു കല്യാണമുണ്ട് പോയെ പറ്റൂ . നീ ബസിന് പൊയ്ക്കോ ”  പാവം അജീഷ് അതും വിശ്വസിച്ച് തിരികെ കയറിപ്പോയി . അവൻ നേരെ കവലയിലേക്ക് വണ്ടി പറപ്പിച്ചു . കുറച്ചു മുന്നോട്ടു മാറ്റി വണ്ടി നിർത്തി . താമസിച്ചില്ല അവളുടെ വണ്ടി എത്തിക്കഴിഞ്ഞു ! തന്റെ ബൈക്ക് കണ്ടതും അവൾ വേഗത കുറച്ചത് അവൻ ശ്രദ്ധിച്ചു . അവൻ പതുക്കെ വണ്ടിയെടുത്തു . സാവധാനം അവളുടെ വലതുവശം വഴി ഒപ്പമെത്തി . ഇന്ന് നഖങ്ങളിലെ നിറങ്ങൾ മാറിയിട്ടുണ്ട് . ആദ്യം കണ്ട ചെരുപ്പാണ് ഇട്ടിരിക്കുന്നത് . മുഖം കാണാനൊരു പരിശ്രമം നടത്തി നോക്കി . അവൾ പഴയതുപോലെ ഒന്ന് തിരിഞ്ഞു നോക്കി . ഷാളുകൊണ്ട് മറച്ച മുഖത്തിൽ തിളങ്ങുന്ന രണ്ടു കണ്ണുകൾ അവൻ കണ്ടു . അതെ , അവൾ ചിരിക്കുകയാണ് ! പല ദിവസങ്ങൾ ഈ കളി തുടർന്നു . പിറകിലിരുന്ന അജീഷിന് ഒന്നും മനസിലായതുമില്ല .

അന്ന് രാത്രി അവനുറങ്ങിയില്ല . അവളുടെ മുഖം എങ്ങിനെയിരിക്കും എന്നായിരുന്നു ചിന്തമുഴുവനും . എങ്ങിനെ അവളോട് മിണ്ടും ? അവളെവിടാണ് പഠിക്കുന്നത് ?  നൂറ് ചോദ്യങ്ങൾ . അന്ന് ഏഴുമണിക്ക് തന്നെ റെഡിയായി അവൻ വെളിയിലിറങ്ങി . നേരെ അജീഷിന്റെ വീട്ടിലെത്തി .  അവനോട് മുഴുവൻ കാര്യങ്ങളും പറഞ്ഞു . ” കാല് കണ്ട് ഒരു പെണ്ണിനെ ഇഷ്ടപ്പെടുകയോ ?”  അജീഷിന് വാട്ടുകപ്പ പോലെ ഈ കാര്യവും ദഹനക്കേടുണ്ടാക്കി . “തിരിച്ച് നിന്റെ കാലൊന്ന് കാണിച്ചുകൊടുത്താൽ ഇതിനൊരു തീരുമാനം ഉണ്ടാവും ” അവനെ കളിയാക്കിയ അജീഷ് പക്ഷെ താമസിയാതെ തന്നെ കാര്യം സീരിയസാണ് എന്ന് മനസിലാക്കി . “നമ്മുക്കിന്നവളെ ഓവർ ടേക്ക് ചെയ്ത് വണ്ടി നിർത്തിക്കാം , പേരും നാളും സകല ചരിത്രവും ചോദിക്കുന്ന കാര്യം ഞാനേറ്റു ” അജീഷ് അവന് ധൈര്യം നൽകി . സമയം എട്ട് പതിനഞ്ച് . റിയർ വ്യൂ മിററിൽ താമര വിരിയുന്നതുപോലെ അവളുടെ സ്‌കൂട്ടി പ്രത്യക്ഷപ്പെട്ടു . പതിവുപോലെ അവനും വണ്ടി പിറകെയെടുത്തു . ഇന്ന് പാദുകങ്ങൾ വേറെയാണ് . നഖങ്ങളിലെ നിറങ്ങൾ മങ്ങിയിരിക്കുന്നു . അവൻ വണ്ടി ഇടത്തേക്ക് തിരിച്ച് അവളുടെ മുന്നിൽ ബ്രെക്കിട്ട് നിർത്തി . അവളും വണ്ടി നിർത്തി . പക്ഷെ തടിയൻ അജീഷ് കാല് കവച്ച് വണ്ടിയിൽ നിന്നിറങ്ങാനെടുത്ത സമയംകൊണ്ട് അവൾ വണ്ടിയെടുത്ത് കടന്നു കളഞ്ഞു . വേണ്ടിയിരുന്നില്ല എന്നവന് തോന്നി . അവൾക്കിഷ്ടപ്പെട്ടുകാണില്ല . നാശം .

“നീ പറഞ്ഞതുപോലെ കാല് കൊള്ളാം … അതുപോലാണ് മുഖമെങ്കിൽ തകർക്കും ”  അജീഷ് അവനെ ആശ്വസിപ്പിക്കാൻ എന്തൊക്കെയോ പുലമ്പി . ” നാളെ നീ വരേണ്ട  ഞാൻ ഒറ്റയ്ക്ക് സംസാരിച്ചോളാം ” അവൻ അജീഷിനോടായി പറഞ്ഞു . നാളെയൊന്നാകാൻ ഒരു യുഗമെടുത്തതായി അവനു തോന്നി . അടുത്ത ദിവസ്സം  വീണ്ടും എട്ട് പതിനഞ്ച് . മിററിന് വലിപ്പം പോരെന്ന് തോന്നിയതിനാൽ അവൻ വണ്ടി, അവൾ വരുന്ന ദിശയിലേക്ക് തിരിച്ചിട്ട് നോക്കിയിരുപ്പായി . സമയമിഴഞ്ഞുനീങ്ങി . അവൾ വന്നില്ല . ഇനി വേറെ വഴി പോയോ ? അതോ നേരത്തെ പോയോ ? അവന്  ആധിയായി . ഇന്നലെ കാണിച്ചത് ഇഷ്ടപ്പെട്ടു കാണില്ല . അതോ കൂട്ടത്തിലൊരാൾ ഉണ്ടായിരുന്നത് കൊണ്ടാണോ ? രണ്ടു മണിക്കൂർ അതെ ഇരുപ്പിരുന്നിട്ട് അവൻ തിരികെ വീട്ടിലേയ്ക്ക് പോയി . ഇന്ന് സമരമാണെന്ന് കള്ളം മൊഴിഞ് നേരെ കട്ടിലിൽ കയറി കിടന്നു . ആകെ നിരാശ തോന്നിയ ദിവസം .  അടുത്ത ദിവസ്സം ഏഴുമണിക്ക് തന്നെ അവൻ കവലയിൽ അവളെക്കാത്ത് കിടപ്പായി . പക്ഷെ അന്നും അവൾ വന്നില്ല . അവനാകെ ഭ്രാന്ത് പിടിച്ചു . തന്നെ ഒഴിവാക്കിയാതാണോ ? ഇല്ല , ആ കണ്ണുകൾ അവൻ കണ്ടതാണ് . ഇനി എന്തെങ്കിലും അപകടം ? ആരോട് ചോദിക്കും ? എവിടെ അന്വേഷിക്കും ? അടുത്ത നാല് ദിവസങ്ങൾക്കൂടി അങ്ങിനെ കടന്നുപോയി . അവളെക്കുറിച്ച് ഒരു വിവരവും കിട്ടിയില്ല . അങ്ങിനെ ഒരു മാസം കഴിഞ്ഞു .

പ്രസാദ് ചേട്ടന്റെ കടയിലെ മുനിപോലുള്ള അവന്റെ ഇരുപ്പ് കൂട്ടുകാർക്ക് അസ്വസ്ഥതയുണ്ടാക്കി . അവസാനം അജീഷ് കാര്യം എല്ലാവരോടും പറഞ്ഞു . “നിനക്കവളുടെ വണ്ടിയുടെ നമ്പർ അറിയാമോ ? എന്റെ അമ്മാവൻ ഈ വകുപ്പിലാണ് പറഞ്ഞാൽ അഡ്രസ് പൊക്കിയെടുക്കാം ” കൂട്ടികാരിലൊരാളുടെ ആഹ്വാനം കെട്ടവന്റെ കണ്ണുകൾ തിളങ്ങി . പക്ഷെ അവനുണ്ടോ വണ്ടിയുടെ നമ്പർ നോക്കിയത് ?  ആയിരം പേരെ നിർത്തിയാലും അവനവളുടെ കാലുകൾ തിരിച്ചറിയും പക്ഷെ വണ്ടിയുടെ നമ്പർ ? അവൻ നിരാശയോടെ മുഖം പൊത്തി . ” എനിക്കറിയാം ! ” അജീഷാണത് പറഞ്ഞത് . കണക്കിൽ പൊതുവെ മുൻപിലുള്ള അജീഷ് നൂറുകണക്കിന് ഫോൺ നമ്പറുകൾ മനഃപാഠമാക്കിയവനാണ് . ഉടൻ  ബൈക്കുകൾ  സ്റ്റാർട്ടായി . ” നീ ഇവിടിരുന്നോ ഞങ്ങൾ പോയിട്ടുവരാം ” കൂട്ടുകാർ പോയി മറയുന്നത് അവൻ നോക്കിയിരുന്നു . അവനു തീരെ പ്രതീക്ഷയുണ്ടായിരുന്നില്ല . പിറ്റേ ദിവസം അവൻ കോളേജിൽ പോയില്ല . വീട്ടിൽ മടിപിടിച്ചിരുന്നു . പക്ഷെ വൈകുന്നേരത്തോടെ അജീഷ് കോളേജിന് സമീപത്തെ ബൂത്തിൽ നിന്നും ഫോൺ വിളിച്ചു . ” എടാ അവളുടെ അപ്പന്റെ പേരിലാണ് വണ്ടി . അഡ്രസ് കിട്ടിയിട്ടുണ്ട് . നാളെ രാവിലെ തന്നെ നീ വീട്ടിലേയ്ക്ക് വാ , നമ്മുക്ക് പോകാം ”

Advertisements

അന്ന് ഉദിക്കില്ലായെന്ന് സൂര്യൻ ശാഠ്യo പിടിക്കുന്നതായി അവനു തോന്നി . ബൈക്കിന്റെ ഇരമ്പൽ കേട്ടതോടെ പല്ലുപോലും തേയ്ക്കാതെ അജീഷ് പിറകിൽ സ്ഥാനം പിടിച്ചു . അധികം ദൂരെയല്ല അവളുടെ വീട് . സ്പീഡിന്റെ കാഠിന്യം കാരണം അജീഷ് പിറകിൽ പേടിച്ച് വിരണ്ടാണിരുന്നത് . ഒരു ചെറു ഗ്രാമം . ഒരു മാടകട തുറന്നു വരുന്നതേയുള്ളൂ . മിൽമ പാൽ വിൽക്കുന്നതിനാൽ ആയാൾ  നേരത്തെ തുറക്കും .  ഒരു ഗ്ളാസ്  ഹോർലിക്സ് ഓർഡർ ചെയ്ത് ബെഞ്ചിൽ കിടന്ന പത്രം വെറുതെ നോക്കി ഒരു ഊളച്ചിരിയോടെ അവൻ കടക്കാരനോട് ചോദിച്ചു . ചേട്ടാ ഈ അഡ്രസ് അറിയുമോ ? ബ്ലോക്കിന്റെ പിറകിലെ പേജിൽ കുറിച്ചിരുന്ന വിലാസം വായിച്ചിട്ട് ആയാൾ ചോദിച്ചു . “ഓ ! നിങ്ങൾ കൊച്ചിനെ കാണാൻ വന്നതാണല്ലേ ? നമ്മുടെ റോസിനെ ? ” ങേ ഈയാൾ നമ്മൾ പെണ്ണുകാണാൻ വന്നവരാണെന്ന് തെറ്റിദ്ധരിച്ചു എന്ന് തോന്നുന്നു ? അജീഷ് പറഞ്ഞു ”  ചേട്ടാ അതല്ല , ഞങ്ങൾ അവളുടെ കൂടെ പഠിക്കുന്നവരാണ് . ” ങാ .. മനസിലായി പിള്ളേരെ . കാര്യങ്ങൾ വഷളാണ് . നിങ്ങൾ പാല് കുടിച്ചിട്ട് നേരെ പൊയ്ക്കൊളൂ , ആ വളവ് തിരിഞ്ഞാൽ  വലത് ആദ്യം കാണുന്ന ഓടിട്ട വീട് ” അജീഷ് അയാളോട് പോയി എന്തൊക്കെയോ കുശുകുശുക്കുന്നതു കണ്ടു .

അവനൊന്നും  മനസിലായില്ല . പക്ഷെ നേരെ എങ്ങിനെ കയറിച്ചെല്ലും ? പക്ഷെ അജീഷിന് കൂസലില്ല . ” വേണ്ടിയെടുക്കെടാ ” തടിയൻ ആജ്ഞാപിച്ചു . വളവു കഴഞ്ഞതും ഓടിട്ട വീടിന് മുന്നിലെത്തിയതും ഒരുമിച്ചു കഴിഞ്ഞു . വീടിന്റെ സിറ്റ് ഔട്ടിൽ ആരൊക്കെയോ ഇരിപ്പുണ്ട് . അവളുടെ വണ്ടി ഒരു മരത്തിൽ ചാരി വെച്ചിരിക്കുന്നത് അവൻ കണ്ടു . കൂസലില്ലാതെ വണ്ടിയിൽനിന്നിറങ്ങി മുറ്റത്തേക്ക് നടന്ന അജീഷിന്റെ പിന്നാലെ അവൻ ഒരു യന്ത്രം പോലെ നടന്നു . അവിടെയിരുന്നു ഒരാളോട് തങ്ങൾ റോസിനെ കാണാൻ വന്നവരാണെന്ന് അജീഷ് നേരെ കയറി തട്ടിവിട്ടു . ”  അകത്തോട്ടു കയറിക്കോളൂ ” ഒരാൾ പറഞ്ഞു . ” നീ പോയി കണ്ടിട്ട് വാ ” ഞാൻ വണ്ടിയുടെ അടുത്ത് കാണും ” അതും പറഞ്ഞുകൊണ്ട് അജീഷ് രംഗം വിട്ടു . അവനൊന്നും മനസിലായില്ല . ഒരാൾ എഴുന്നേറ്റ് കൂടെ വന്നു . അവൻ അയാളുടെ കൂടെ അകത്തേക്ക് പോയി . അവിടെ ഒരു കട്ടിലിൽ ഒരു പെണ്ണ് കിടപ്പുണ്ട് . അവൻ അടുത്തേക്ക് ചെന്നു . പുതപ്പിനിടയിലൂടെ അവളുടെ കാലുകൾ അവൻ കണ്ടു . പക്ഷെ അവളുടെ മുഖം കണ്ടവൻ ഒന്ന് ഞെട്ടി . തലയിൽ ഒരു മുടിപോലുമില്ല ! പക്ഷെ കണ്ണുകൾക്ക് അതേ തിളക്കം ! മുടിയില്ലാത്തതാണ് അവൾക്ക് ഭംഗിയെന്ന് തോന്നി . അത്രക്കാകർഷകമായ മുഖം . “വരുമെന്ന് കരുതിയില്ല ” വളരെ ബുദ്ധിമുട്ടിയാണ് അവളത് പറഞ്ഞത് . അവനൊന്നും മനസിലായില്ല . “മോനേതാ ? ” ആ ചോദ്യം കേട്ട് അവൻ തിരിഞ്ഞു നോക്കി . അവളുടെ അമ്മയാണ് . ” ഞാൻ പറഞ്ഞില്ലേ , ആ ബൈക്കിൽ ? ” അവൾ അമ്മയോടായി പറഞ്ഞു . ” ഓ പിടികിട്ടി . മോൻ ചിലപ്പോൾ വരുമെന്നവൾ പറഞ്ഞിരുന്നു , ഇരിക്ക് ഞാൻ കാപ്പിയെടുക്കാം ” ഇത്രയും പറഞ്ഞവർ അകത്തേക്ക് പോയി . അവൻ ആകെ വിരണ്ടുപോയി . എന്താണിതൊക്കെ ? ” ഞാ …. ൻ  ‘അമ്മ …യോട് പറഞ്ഞിരുന്നു …… എന്നെ….. ഇഷ്ടപ്പെടുന്ന ഒരാളുണ്ട് , വണ്ടിയിൽ കാത്തിരിക്കുന്ന … ഒരാൾ …… എനിക്ക് തോന്നി …. കാണാതായാൽ …… വരുമെന്ന് ……… ” അവളുടെ കണ്ണുകൾ നിറഞ്ഞൊഴുകി . അവനൊന്നും പറയാനുണ്ടായിരുന്നില്ല . അവളുടെ  അമ്മ  കാപ്പിയുമായി മടങ്ങിയെത്തി . ” മോനെ അവൾക്ക് ക്യാൻസറാണ് , ഒന്ന് രണ്ട് കൊല്ലമായി . ഇപ്പോൾ തീരെ വയ്യ ” അതുകേട്ട് അവന്റെ വായിലെ വെള്ളവും ധമനികളിലെ  രക്തവും ഉറഞ്ഞുപോയി . ” ഈയാൾക്കെന്നെ കിട്ടില്ലെടോ ” കരഞ്ഞുകൊണ്ടവളൊരു തമാശ പറഞ്ഞു .  ” പേര് .. പറയാമോ ” അവൾ വിക്കി വിക്കി ചോദിച്ചു . ” ജൂലിയസ് …..  ജൂലിയസ് മാനുവൽ ” അവനും വാക്കുകൾ തപ്പിത്തടവി .

എത്ര മണിക്കൂറുകൾ അവിടെയിരുന്നു എന്നവന് അറിയില്ല . വേദനയുണ്ടെങ്കിലും അവൾ വാ തോരാതെ സംസാരിച്ചു . എന്ത് ക്യാൻസറെന്നോ , എവിടാണെന്നോ അവൻ ചോദിച്ചില്ല . അതറിയേണ്ട കാര്യം അവനില്ലായിരുന്നു . അജീഷ് പുറത്ത് വീട്ടുകാരോട് എന്തെക്കെയോ പറഞ്ഞുകൊണ്ട് സമയം ചിലവഴിച്ചു . വൈകുന്നേരം ഇറങ്ങാൻ നേരം അവൾ ചോദിച്ചു ” ഇനി വരുമോ ? ” ” വരും നാളെ വരും ” അവന്റെ ഉത്തരത്തിനൊരു വാശിയുണ്ടായിരുന്നു . പിന്നീടുള്ള ആറു ദിവസങ്ങൾ അവനവിടെ പോയി  അവൾക്ക് കൂട്ടിനിരുന്നു . അവളുടെ വീട്ടുകാർ ഒരു കുടുംബാഗമെന്നതുപോലെ അവനോട് പെരുമാറി . അവൾ എങ്ങിനെയും സന്തോഷിക്കട്ടെ എന്നവർ തീരുമാനിച്ചുകാണും . ദിവസങ്ങൾ കഴിയുംതോറും അവളുടെ ശബ്ദം നേർത്തുനേർത്തു വന്നു . അവസാനം അവൾ തീരെ മിണ്ടാതായി . അവനെ കാണുമ്പോൾ ചിരിച്ചെന്ന് വരുത്തിത്തീർക്കും . അവൻ പറയുന്നതൊക്കെ കണ്ണിൽ തന്നെ നോക്കി കേട്ടുകൊണ്ട് കിടക്കും .

അന്നൊരു ദിവസം അവനു പോകാൻ സാധിച്ചില്ല . രാത്രിയിൽ പോകണെമന്നുണ്ടായിരുന്നു . പക്ഷെ എന്തുപറഞ്‌ വീട്ടിൽ നിന്നിറങ്ങും ? വെളുപ്പിനെവരെ അവൻ ഉറങ്ങാതെ കഴിച്ചുകൂട്ടി . അതിരാവിലെ തന്നെ അജീഷിനെയും കൂട്ടി അവളുടെ വീട്ടിലേക്ക് പറന്നു . പക്ഷേ ആ കടയുടെ അടുത്തെത്തിയപ്പോഴേക്കും അവൻ അപകടം മണത്തു . വഴി നിറയെ ആളുകൾ ! അവളുടെ വീട്ടിലേയ്ക്ക് വണ്ടി പോകില്ല . അവനു കാര്യം മനസിലായി . നേരെ കടയിലേക്ക് കയറിച്ചെന്നു . ” അവള് പോയെല്ലോടാ മക്കളേ ” കടക്കാരൻ ഉച്ചത്തിൽ പറഞ്ഞു . എപ്പോൾ ? അജീഷ് ചോദിച്ചു . ” ഇന്നലെ വൈകുന്നേരം, ഇന്ന് വൈകുന്നേരം അടക്കും ”

അവൻ ആ കടയിലെ ബെഞ്ചിൽ ഇരുന്നു . ഇല്ല അകത്തു കയറി അവളെ തനിക്കു കാണേണ്ട . ആ താളം പിടിക്കുന്ന വിരലുകളും , ചിരിക്കുന്ന മുഖവും …. അതങ്ങിനെ തന്നെ മനസ്സിൽ ഇരിക്കട്ടെ . ഞാൻ മരിക്കുമ്പോഴേ അവളും മരിക്കൂ ……….

ഇന്നീ നാൽപ്പത്തൊന്നാം വയസിൽ ഇതിലെ മൂന്ന്  പ്രധാന കഥാപാത്രങ്ങളിൽ അവൻ മാത്രമേ ജീവിച്ചിരിപ്പുള്ളൂ . അജീഷ് ഏതാനും വർഷങ്ങൾക്ക് മുൻപ് മരണമടഞ്ഞു .

വരയ്ക്കാൻ കഴിവുണ്ടായിരുന്നുവെങ്കിൽ ആദ്യം ജീവൻ തുടിക്കുന്ന അഞ്ചു വിരലുകളും , ചിരിക്കുന്ന ഒരു മുഖവും അവൻ വരച്ചേനെ . പക്ഷെ ഇപ്പോൾ അവളുടെ മുഖം അവ്യക്തമാകാൻ തുടങ്ങിയിരിക്കുന്നു . കാലം മനസ്സിനെ കീഴ്പ്പെടുത്താൻ തുടങ്ങിക്കാണണം . അവന് ദൈവം ഉണ്ടെന്ന് വിശ്വസിച്ചേ പറ്റൂ … കാരണം ….. അവനൊന്നുകൂടെ അവരെ കാണണം ….  ആ പാദങ്ങളുടെ ഉടമയെയും …. ആ തടിയനെയും ……

 

If you want to keep this site alive, please disable your adblocker or whitelist this site!

Then refresh your browser. Thanks.

ഒട്ടനവധി അറിവുകൾ സമാഹരിച്ചിരിക്കുന്ന ഈ സൈറ്റ് നിലനിർത്തണമെങ്കിൽ നിങ്ങളുടെ സഹായം കൂടിയേ തീരൂ.

അതിനാൽ ആഡ്ബ്ലോക്കർ നിർജ്ജീവമാക്കിയ ശേഷം  സൈറ്റ് വീണ്ടും സന്ദർശിക്കുക.

ജൂലിയസ് മാനുവൽ