YouTube Content Provider
* Blogger * Translator * Traveler

നിര്‍ഭാഗ്യവാനായ പര്യവേഷകന്‍ !

by Julius Manuel
40 പേർ വായിച്ചു
🛑 You are not allowed to use this text content for YouTube Videos without permission 🛑
ട്ടുമിക്ക ആഫ്രിക്കന്‍ പര്യവേഷണങ്ങളും ആരംഭിക്കുന്നതിനു മുന്‍പ് നൈല്‍ നദീതടത്തെക്കുറിച്ച് ആധികാരികമായ കുറിപ്പ് തയ്യാറാക്കിയ എഴുത്തുകാരനാണ് Leo Africanus . സ്പെയിനിലെ മുസ്ലീം ഭരണകാലത്ത് ഗ്രനഡയില്‍ ജനിച്ച് അടിമയായി റോമിലെത്തുകയും പിന്നീട് പോപ്‌ ലിയോ പത്താമെന്റെ ഇഷ്ടതോഴനാകുകയും ചെയ്ത ലിയോ , എഴുതിയ ആഫ്രിക്കന്‍ കുറിപ്പുകള്‍ വായിച്ചിട്ടാണ് ഓരോ യാത്രികരും ആഫ്രിക്കയുടെ ഇരുളിലേക്ക് കാലെടുത്തു വെച്ചിരുന്നത് . അലക്സാണ്ടര്‍ ഗോര്‍ഡന്‍ ലയിംഗും ആ പതിവ് തെറ്റിച്ചില്ല . പക്ഷെ അദ്ദേഹത്തിന്‍റെ ലക്‌ഷ്യം Timbuktu എന്ന ആഫ്രിക്കന്‍ നഗരമായിരുന്നു . ഇന്നത്തെ മാലിയില്‍ ഉള്ള Timbuktu , ഒരു സമ്പന്ന നഗരമാണ് എന്ന അറിവാണ് ലൈയിങ്ങിനെ അങ്ങോട്ട്‌ ആകര്‍ഷിച്ചത് . അത് ഒരു പരിധിവരെ ശരിയുമായിരുന്നു . ഒരു കാലത്ത് ഇസ്ലാമിന്‍റെ ആഫ്രിക്കന്‍ തലസ്ഥാനമായിരുന്നു Timbuktu . അറബികളും ആഫ്രിക്കന്‍ കാപ്പിരികളും മാത്രം അറിഞ്ഞിരുന്ന ഇന്നത്തെ മാലിയിലേക്ക് അന്ന് ഒരു യൂറോപ്യനും എത്തിച്ചേര്‍ന്നിരുന്നില്ല .

സ്കോട്ടിഷ് യാത്രികനായിരുന്ന ലയിംഗ് നൈജര്‍ നദിയുടെ ഉറവിടവും കൂട്ടത്തില്‍ Timbuktu നഗരത്തിലേക്കുള്ള വഴിയും കണ്ടുപിടിക്കാം എന്ന് കരുതിയാണ് യാത്ര തിരിച്ചത് . 1825 ജൂലൈ പതിനാറിന് യാത്ര തിരിക്കുമ്പോള്‍ അദ്ദേഹത്തിന്‍റെ കല്യാണം കഴിഞ്ഞ് വെറും രണ്ടേരണ്ടു ദിവസങ്ങള്‍ മാത്രമേ കഴിഞ്ഞിരുന്നുള്ളൂ ! ലിബിയയിലെ ട്രിപോളിയില്‍ വെച്ചായിരുന്നു കല്യാണം .
വിശാലമായ സഹാറ മരുഭൂമി വടക്ക് നിന്നും തെക്കോട്ട്‌ മുറിച്ചു കടന്ന, അറിയപ്പെടുന്ന ആദ്യ യൂറോപ്യനായി മാറി അദ്ദേഹം . കൂട്ടിന് വഴികാട്ടിയായി സഹാറന്‍ മരുഭൂവിലെ നാടോടി ഗോത്രങ്ങളില്‍ ഒന്നായ Tuareg ലെ ഒരു പ്രധാനിയും ഉണ്ടായിരുന്നു . സഹാറന്‍ പ്രദേശത്തെ അതിപുരാതന നഗരമായ Ghadames ല്‍ അദ്ദേഹം എത്തിച്ചേര്‍ന്ന വഴി ഇന്നും വ്യക്തമല്ല . ഒക്ടോബര്‍ ഇരുപത്തി അഞ്ചിനാണ് ഇവര്‍ അവിടെ എത്തിയത് എന്നാണ് ഇപ്പോള്‍ കരുതപ്പെടുന്നത് . പോകുന്ന വഴികളില്‍ കാണുന്ന കാപ്പിരികള്‍ തന്നെ അത്ഭുതത്തോടെ നോക്കുന്നതായും അവര്‍ കാണുന്ന ആദ്യ വെള്ളകാരന്‍ താനാണെന്നും ലയിംഗ് ഭാര്യക്ക്‌ കത്തുകള്‍ എഴുതി . പക്ഷെ അദ്ദേഹം സ്വപ്നം പോലും കാണാതിരുന്ന ഒരു ദുരന്തം വഴിയില്‍ കാത്തിരിക്കുന്നുണ്ടായിരുന്നു !

ലയിങ്ങിനും മുന്നേ ഇതേ വഴി കടന്നു പോയ Mungo Park എന്ന യൂറോപ്യന്റെ പ്രേതമായിരുന്നു അത് ! ആഫ്രിക്കന്‍ ഗോത്രങ്ങള്‍ക്കിടയില്‍ പാര്‍ക്ക് എന്ന വെള്ളക്കാരന്റെ പേര് “Ruthless Murderer “എന്നായിരുന്നു എന്നറിയുമ്പോള്‍ തന്നെ കാര്യങ്ങള്‍ ഊഹിക്കാവുന്നതേ ഉള്ളൂ . ഇഷ്ടമില്ലാത്ത കാപ്പിരികളെ ചറപറാ വെടിവെച്ചു തള്ളി ” പര്യവേഷണം ” നടത്തിയ പാര്‍ക്കും ഒരു സ്കോട്ട്ലണ്ട് കാരനായിരുന്നു . നൈജര്‍ നദീതീരങ്ങളില്‍ വെള്ളക്കാര്‍ക്ക് അത്യാവശ്യം “നല്ലപേര് ” സമ്പാദിച്ച് വെച്ച് പാര്‍ക്ക് കടന്നു പോയ അതെ വഴികളില്‍ കൂടി ആയിരുന്നു ലയിഗും നടന്നു നീങ്ങിയത് . അതിനാല്‍ തന്നെ ആഫ്രിക്കന്‍ ഗോത്രങ്ങളില്‍ നിന്നും കനത്ത എതിര്‍പ്പാണ് ലയിങ്ങിനു നേരിടേണ്ടി വന്നത് . 1826 ജാനുവരി പത്തിന് അദ്ദേഹം Tuareg ഗോത്രക്കാരുടെ ഒരു കച്ചവട സംഘത്തോടൊപ്പം ചേര്‍ന്ന് യാത്ര തുടര്‍ന്നു . പക്ഷെ യാത്രക്കിടയില്‍ അവര്‍ അനേകം ആക്രമണങ്ങള്‍ക്ക് ഇരയായിത്തീര്‍ന്നു . കച്ചവട സംഘങ്ങള്‍ക്ക് നേരെ ഇത്തരം ആക്രമങ്ങള്‍ അന്ന് പതിവായിരുന്നു എങ്കിലും കവര്‍ച്ചക്കാര്‍ ലയിങ്ങിനെ കണ്ടിട്ടാണ് ആക്രമണം നടത്തിയത് എന്നായിരുന്നു കൂട്ടത്തിലുള്ള കച്ചവടക്കാര്‍ കരുതിയിരുന്നത് . ഇരുപത് വര്‍ഷങ്ങള്‍ക്കു മുന്‍പേ മണ്ണടിഞ്ഞ പാര്‍ക്കിനോടുള്ള വിരോധം അത്രക്കുമുണ്ടായിരുന്നു എന്നതാണ് സത്യം .

ലയിങ്ങിന്റെതായി കണ്ടെടുത്ത ചില കുറിപ്പുകളില്‍ നിന്നും അദ്ദേഹം യാത്രക്കിടയില്‍ നിരന്തര രോഗങ്ങള്‍ക്കും ആക്രമങ്ങള്‍ക്കും വിധേയനായിരുന്നു എന്ന് വ്യക്തമാകുന്നുണ്ട് . മേയ് മാസത്തില്‍ ഏതോ ഒരു രാത്രി ലയിങ്ങിന്റെ ജീവിതം തന്നെ തകര്‍ത്ത ആക്രമണം ഉണ്ടായി . സ്വന്തം കൂടാരത്തില്‍ ഉറങ്ങിയിരുന്ന ലയിങ്ങിനു ആക്രമണം ശരിയായ രീതിയില്‍ തടുക്കാന്‍ കഴിഞ്ഞില്ല . വെളുപ്പിനെ മരണാസന്നനായി അദ്ദേഹത്തെ മറ്റൊരു ഗോത്രക്കാര്‍ കണ്ടെടുക്കുമ്പോള്‍ ദേഹത്ത് ഇരുപതോളം ആഴത്തിലുള്ള മുറിവുകള്‍ ഉണ്ടായിരുന്നു . ഒരു കയ്യ് വെട്ടേറ്റു അറ്റ് തൂങ്ങിയ നിലയിലും ആയിരുന്നു . ലയിങ്ങിനെ , വഴികാട്ടിയായിരുന്ന നാടോടി തന്നെയാണ് ചതിച്ചത് എന്നാണ് മിക്ക ചരിത്രകാരന്മാരും കരുതുന്നത് . എന്തായാലും ആഫ്രിക്കന്‍ പ്രകൃതിചികിത്സകള്‍ വഴി ജീവന്‍ നിലനിര്‍ത്തിയ അദ്ദേഹം മറ്റൊരു സംഘത്തോടൊപ്പം മാസങ്ങള്‍ക്ക് ശേഷം തന്‍റെ ലക്ഷ്യസ്ഥാനമായ Timbuktu വില്‍ എത്തിച്ചേര്‍ന്നു . ലയിംഗ് അവസാനമായി എഴുതിയ കുറിപ്പുകളില്‍ നിന്നും വ്യക്തമാകുന്നത് അദ്ദേഹം അവിടെ മൂന്നു ദിവസങ്ങള്‍ ചിലവഴിക്കാന്‍ തീരുമാനിച്ചു എന്നാണ് . പക്ഷെ അടുത്തകാലത്ത് കിട്ടിയ തെളിവുകള്‍ അനുസരിച്ച് ലയിംഗ് ഏതാണ്ട് ഒരുമാസകാലം നഗരത്തില്‍ ഉണ്ടായിരുന്നു എന്നാണ് . അതിനു ശേഷം മറ്റേതോ സംഘത്തോടൊപ്പം തിരികെ യാത്രയായ അദ്ദേഹത്തെകുറിച്ച് പിന്നീടൊരു വിവരവും ലഭിച്ചിട്ടില്ല . ലഭ്യമായ വിവരങ്ങള്‍ വെച്ച് അദ്ദേഹം കൊല്ലപ്പെട്ടിരിക്കും എന്ന് തന്നെയാണ് മിക്ക ഗവേഷകരും കരുതുന്നത് . അനേക വര്‍ഷങ്ങള്‍ക്കു ശേഷം നഗരത്തില്‍ കാലുകുത്തിയ ഫ്രഞ്ച് സൈന്യമാണ്‌ ലയിങ്ങിനെ കുറിച്ചുള്ള കൂടുതല്‍ വിവരങ്ങള്‍ തപ്പിയെടുത്തത് . എന്തായാലും പിന്നീടുണ്ടായ അനേകം സാഹസിക യാത്രകള്‍ക്ക് അലക്സാണ്ടര്‍ ഗോര്‍ഡന്‍ ലയിംഗ് (Alexander Gordon Laing ) ഒരു വഴികാട്ടിയായി തീര്‍ന്നു .

🛑 You are not allowed to use this text content for YouTube Videos without permission 🛑

Leave a Comment

This site uses Akismet to reduce spam. Learn how your comment data is processed.

MORE POSTS

This website uses cookies to improve your experience. We'll assume you're ok with this, but you can opt-out if you wish. Accept Read More