Oops! It appears that you have disabled your Javascript. In order for you to see this page as it is meant to appear, we ask that you please re-enable your Javascript!
YouTube Content Provider
* Blogger * Translator * Traveler

ഭൂമി താങ്ങുന്ന മരം !- Tree of Life

by Julius Manuel
123 പേർ വായിച്ചു
🛑 You are not allowed to use this text content for YouTube Videos without permission 🛑

മരങ്ങൾക്ക് മനുഷ്യമനസുകളിൽ ഇത്രയധികം പ്രാധാന്യം വന്നതെങ്ങനെ എന്ന് പലരും മുൻപേ ചിന്തിച്ച കാര്യമാണ് . ഭൂമിയിലെ സകലമതങ്ങളിലും വളരെയധികം പ്രാധാന്യമുള്ള ഒരു വിശുദ്ധമരമെങ്കിലും ഉണ്ടാവും . ബൈബിൾ അനുസരിച്ചും ആധുനിക ഏലിയൻ സിദ്ധാന്തം അനുസരിച്ചും മനുഷ്യൻ ഭൂമിയിൽ എത്തുന്നതിനും മുന്നേ മരങ്ങൾ ഇവിടുണ്ട് . ഏദനിൽ ഉണ്ടായിരുന്നതും , കോമൺസെൻസ് ഉള്ളതുമായ (നൻമയും തിൻമയും തിരിച്ചറിയാൻ കഴിവുള്ള ) ഒരു മരമാണ് ബൈബിളിലെ ആദ്യപുസ്തകത്തിലെ നായകൻ . മനുഷ്യന്റെയും മറ്റു പ്രൈമേറ്റുകളുടെയും പൊതുപൂർവ്വികർ കൂടുതൽ സമയവും മരങ്ങളിൽ ചിലവഴിച്ചിരുന്നതിനാൽ മരം എന്നത് ഹോമോസാപ്പിയനുകളുടെ ബുദ്ധിയുടെ അകത്തളങ്ങളിൽ ട്രാപ്പ് ചെയ്തു കിടക്കുന്ന ഒരു ഓർമ്മയാണ് എന്ന് ചില പരിണാമ ഗവേഷകർ കരുതുന്നു . കേരളത്തിലെ ആൽമരങ്ങളും , വിശുദ്ധവനങ്ങളായ കാവുകളും ഈ സിദ്ധാന്തങ്ങളിലെ മലയാളി സാന്നിധ്യമാണ് . ഹൈന്ദവ – ബുദ്ധമതങ്ങളിലെ ബോധിവൃക്ഷമാണ് (अश्वत्थ) ഇക്കൂട്ടത്തിൽപെടുന്ന മറ്റ് ഭാരതീയ വ്യക്ഷങ്ങൾ .

എന്താണ് ഒരു വലിയ മരത്തിന്റെ പ്രത്യേകത ? അതിന്റെ തലപ്പുകൾ അങ്ങ് ആകാശത്തെ തഴുകിനിൽക്കും ( സ്വർഗ്ഗം ), അതിന്റെ തടി നമ്മുക്ക് മുഖാമുഖവും സമാസമവും ആണ് ( ഭൂമി ), ഇനി അതിന്റെ വേരുകളാവട്ടെ ചൂഴ്ന്നിറങ്ങി ഭൂമിയുടെ ഗർഭപാത്രത്തിലേക്കു പോകുന്നു ( പാതാളം ) . ചുരുക്കത്തിൽ പുരാണങ്ങളിലെ മൂന്നുലോകങ്ങളുമായി ഒരേസമയം ബന്ധം പുലർത്തുകയും , മൂന്നു ലോകങ്ങളിൽ ഒരേസമയത് ജീവിക്കുകയും ചെയ്യുന്ന ഒരേയൊരു ഭൗമനിവാസിയാണ് വൃക്ഷം ! ഇങ്ങനെയൊക്കെയുള്ള ചിന്തകളാവാം പഴയകാലങ്ങളിൽ മനുഷ്യരെ world tree എന്ന സങ്കൽപ്പത്തിലേക്കു നയിച്ചത് . അതായത് വേരുകളാൽ ഭൂമിയെ താങ്ങിനിർത്തുകയും , ശിഖരങ്ങളാൽ ഭൂമിക്കു തണലേകുകയും ചെയ്യുന്ന ഒരു പടുകൂറ്റൻ വൃക്ഷരാജൻ ! ഒട്ടുമിക്ക യൂറോപ്യൻ , ലാറ്റിനമേരിക്കൻ പുരാണങ്ങളിലും ഇങ്ങനെയൊരു വൃക്ഷത്തെപ്പറ്റി പരാമർശമുണ്ട് . ജീവന്റെ വൃക്ഷം (tree of life) ഇതിന്റെ മറ്റൊരു വേർഷനോ അല്ലെങ്കിൽ മറ്റൊരു പേരോ വൃക്ഷമോ ആകാം . ബൈബിളിൽ ഉൽപ്പത്തിയിൽ തന്നെ ഈ വൃക്ഷവും പ്രത്യക്ഷപ്പെടുന്നുണ്ട് (Etz Chaim עץ חיים ). ബൈബിളിൽ പെടാത്ത ഈനോക്കിന്റെ ബുക്ക് പ്രകാരം അവസാന വിധിനാളിൽ ഈ രണ്ടാമത്തെ മരത്തിന്റെ ഫലം നമ്മുക്ക് തിന്നാൻ കിട്ടും .

പ്രീ – കൊളംബിയൻ കാലത്ത് ദക്ഷിണ അമേരിക്കയിൽ ഇത്രയും തന്നെ പ്രാധാന്യം കല്പിച്ചിരുന്ന ഒരു മരമാണ് Ceiba . മായൻ വിശ്വാസമനുസരിച്ച് ഭൂമിയെ താങ്ങിനിർത്തുന്നത് ഒരു പടുകൂറ്റൻ Ceiba വൃക്ഷമാണ് . അതിന്റെ ശാഖകളാണ് ആമസോൺ വനങ്ങളിൽ കാണുന്ന മറ്റു Ceiba മരങ്ങൾ . അതുകൊണ്ടു തന്നെ പണ്ടുമുതലേ ഈ വൃക്ഷങ്ങൾ അവർ മുറിക്കാറുണ്ടായിരുന്നില്ല . ഇപ്പോൾ പോലും അനധികൃത മരംവെട്ടുകാർ ഈ മരങ്ങൾ ഒഴിവാക്കിയാണ് വനം വെട്ടിവെളുപ്പിക്കുന്നത് ! മാത്രമല്ല വിശ്വാസമനുസരിച്ച് ഈ മരങ്ങൾക്ക് നമ്മുടെ വിചാരങ്ങളും , മരത്തിന് ചുറ്റും നടക്കുന്ന കാര്യങ്ങളും സ്വർഗ്ഗത്തിലേക്ക് അപ്‍ലോഡ് ചെയ്യാനും , പാതാളത്തിലേക്ക് ഡൌൺലോഡ് ചെയ്യാനും സാധിക്കും ! ഈ സങ്കൽപ്പമാണ് ജെയിംസ് കാമറൂൺ തന്റെ അവതാർ എന്ന ചിത്രത്തിലേക്ക് ആവാഹിച്ചത് . ചിത്രത്തിൽ രണ്ടുതരം വൃക്ഷങ്ങൾ ഉണ്ട് ആത്മാക്കളുടെ വൃക്ഷവും (Na’vi name: Vitraya Ramunong), ശബ്ദങ്ങളുടെ വൃക്ഷവും (Na’vi name: Utral Aymokriyä) .

ദക്ഷിണ അമേരിക്കയിൽ ചെന്നാൽ Ceiba എന്ന പേര് കേട്ട് നാം മടുക്കും . നഗരങ്ങൾ , ഷോപ്പുകൾ, മലകൾ , കുന്നുകൾ , ആളുകൾ , ഉൽപ്പന്നങ്ങൾ എന്നിങ്ങനെ സകലസ്ഥലത്തും ഈ പേരുണ്ടാവും . മായൻ കാലത്തെ ഏറ്റവും വലിയ സ്റ്റെപ് പിരമിഡായ Temple of the Cross ൽ ചെന്നാൽ ഒത്തനടുക്ക് കുരിശാകൃതിയിൽ ഒരു Ceiba മരത്തടി കാണാൻ സാധിക്കും . അവരുടെ വിശ്വാസത്തിൽ ഭൂമിയുടെ കേന്ദ്രവും ജീവനും ഇവിടാണ് ഉള്ളത് . ഗ്വോട്ടിമാലയുടെ ദേശീയവൃക്ഷവും Ceiba തന്നെയാണ് . നൂറ്റാണ്ടുകളായി വിശുദ്ധപദവി കയ്യാളുന്നതിനാൽ ദക്ഷിണ അമേരിക്കയിൽ പലയിടത്തും അഞ്ഞൂറിലേറെ വർഷങ്ങൾ പഴക്കമുള്ള ഒട്ടനവധി Ceiba വൃക്ഷങ്ങൾ കാണാൻ സാധിക്കും . പ്രശസ്തമായ ചില Ceiba വൃക്ഷങ്ങളെ കമന്റുകളിൽ ഉൾപ്പെടുത്തിയിട്ടുണ്ട് .

NB : നമ്മുടെ പഞ്ഞി മരം ഈ വകുപ്പിൽ പെടും (Ceiba pentandra)

🛑 You are not allowed to use this text content for YouTube Videos without permission 🛑

Leave a Comment

This site uses Akismet to reduce spam. Learn how your comment data is processed.

MORE POSTS

This website uses cookies to improve your experience. We'll assume you're ok with this, but you can opt-out if you wish. Accept Read More