YouTube Content Provider
* Blogger * Translator * Traveler

അന്യഗ്രഹജീവികൾക്കായി ഒരു സംഗീതവിരുന്ന് !

by Julius Manuel
115 പേർ വായിച്ചു
🛑 You are not allowed to use this text content for YouTube Videos without permission 🛑

അന്യഗ്രഹത്തിലെ സമാന്തരനിവാസികൾക്കായുള്ള തിരച്ചിൽ (SETI – Search for Extra-Terrestrial Intelligence) ഇന്നും ഇന്നലെയുമൊന്നും തുടങ്ങിയതല്ല. വോയേജർ പേടകങ്ങളിൽ അവർക്കായുള്ള സന്ദേശങ്ങൾ റെക്കോർഡ് ചെയ്തിട്ടുള്ളത് അറിയാമല്ലോ . ഇതിന് സമാനമായി പലപ്പോഴായി പലരും റേഡിയോ സന്ദേശങ്ങൾ ഇവർക്കായി ഭൂമിയിൽ നിന്നും അയച്ചിട്ടുമുണ്ട് . ഇത്തരമൊരു സംരംഭമായിരുന്നു റ്റീൻ എയ്ജ് മെസ്സേജ് (TAM) എന്ന സംഗീത വിരുന്ന് . ഉക്രേനിയൻ സ്പേസ് ഏജൻസിയുടെ കീഴിൽ ക്രിമിയയിൽ ഉള്ള സെന്റർ ഫോർ ഡീപ് സ്പേസ് കമ്യൂണിക്കേഷൻ ആണ് ഇതിനായി മുൻകൈ എടുത്തത് . സപ്തര്‍ഷികള്‍ ഉൾപ്പടെ നമ്മുടേതിന് സമാനമായ ആറ് നക്ഷത്രസമൂഹങ്ങളെയാണ് റ്റീൻ എയ്ജ് മെസ്സേജ് ലക്ഷ്യമാക്കിയത് .

ഈ  TAM, മൂന്ന് ഭാഗങ്ങളുള്ള ഓരോ മൊഡ്യൂളുകൾ ആയിരുന്നു . അന്യഗ്രഹജീവികൾക്ക് ഈ മെസ്സേജ് എളുപ്പം തിരിച്ചറിയാൻ പാകത്തിലുള്ള ഒരു ശബ്ദാവൃതിയായിരുന്നു ഒന്നാം ഭാഗം . തെറമിൻ എന്ന സംഗീതോപകരണം വെച്ചുള്ള ഏഴ് മെലഡികൾ ആയിരുന്നു രണ്ടാം ഭാഗം . അവസാനഭാഗത്തിൽ റഷ്യയിലും ഇഗ്ളീഷിലുമുള്ള അഭിവാദ്യങ്ങളും ,പിന്നെ വിവിധ കലാകാരന്മാരുടെ ചിത്രങ്ങളും , ഗാനങ്ങളും . എന്നത്തേയും പോലെ അന്യഗ്രഹജീവികളെ ക്ഷണക്കത്തയച്ച് ഇങ്ങോട്ട് വരുത്തിക്കണോ എന്ന് തുടങ്ങിയുള്ള ആരോപണങ്ങൾ വകവെയ്ക്കാതെ ഒരു കൂട്ടം ഗവേഷകർ 2001 ആഗസ്റ്റ് സെപ്റ്റംബർ മാസങ്ങളിലായി ഈ റേഡിയോ സന്ദേശങ്ങൾ അയയ്ക്കുക തന്നെ ചെയ്തു .

ഇവിടെ തെറമിൻ എന്ന പേര് നിങ്ങൾ ശ്രദ്ധിച്ചു കാണും . എന്താണ് ഈ സംഗീതോപകരണം ? എന്തിനാണ് ഇത് തിരഞ്ഞെടുത്തത് ? കാരണമിതാണ് . ഒരേ പ്രപഞ്ചത്തിൽ സ്ഥിതിചെയ്യുന്നതിനാൽ സയൻസിലെ നിയമങ്ങളും , ചുറ്റുമുള്ള മൂലകങ്ങളും , അങ്ങിനെ മറ്റു പലതും അന്യഗ്രഹജീവികൾക്കും , നമ്മുക്കും ഒരുപോലെയാവാം . പക്ഷെ നമ്മുടെ സംസ്ക്കാരം , അത് നമ്മുടേത് മാത്രമായിരിക്കും . നമ്മുടെ സംഗീതം , അതും വേറിട്ടതാവും തീർച്ച. അങ്ങിനെയെങ്കിൽ വേറിട്ട സംഗീതത്തിലെ വേറിട്ട സംഗീതോപകരണം തന്നെ ഈ മെസേജിനായി ഉപയോഗിക്കണം . അങ്ങിനെയെങ്കിൽ എന്താണ് തെറമിന് ഇത്ര പ്രത്യേകത ?

തെറമിൻ എന്ന സംഗീതോപകരണത്തിന്റെ പ്രത്യകത ഇതാണ് , അത് വായിക്കുവാൻ നാം അതിൽ തൊടേണ്ട ആവശ്യമില്ല !

അതെ ! Theremin എന്ന ഈ ഉപകരണം വായിക്കുവാൻ ഇതിൽ തൊടേണ്ട ആവശ്യം ഇല്ല , വെറുതെ ആഗ്യം കാണിച്ചാൽ മതി. 1917 ലെ ആഭ്യന്തര യുദ്ധകാലത്ത് റഷ്യൻ ഗവർമെന്റിന്റെ സഹായത്തോടെ നടത്തി വന്നിരുന്ന , പ്രോക്സിമിറ്റി സെൻസറുകളെ കുറിച്ചുള്ള ഗവേഷണങ്ങൾക്കിടയിലാണ് ഈ സംഗീതോപകരണത്തിന്റെ ജനനം . 1919 ഒക്ടോബറിൽ ഒരു യുവ ഗവേഷകനായിരുന്ന Lev Sergeyevich Termen ( ലിയോൺ തെറമിൻ ) ആണ് പ്രോക്സിമിറ്റി സെൻസറുകളുടെ സഹായത്തോടെ പ്രവർത്തിക്കുന്ന ഈ മ്യൂസിക്കൽ ഇൻസ്ട്രമെന്റ് കണ്ടു പിടിച്ചത് . പിന്നീട് അമേരിക്കയിലെത്തിയ ഇദ്ദേഹം 1928 ൽ ഇത് പേറ്റന്റ് ചെയ്യുകയും ചെയ്തു .

ചെവിയോട് ചേർത്ത് വെച്ച് ആരോടെങ്കിലും സംസാരിക്കുമ്പോൾ നമ്മുടെ സ്മാർട്ട് ഫോണിന്റെ ഡിസ്പ്ലേ തനിയെ ഓഫാകുന്നത് പ്രോക്സിമിറ്റി സെൻസറിന്റെ സഹായത്തോട് കൂടിയാണ് . സ്വയം പുറപ്പെടുവിക്കുന്ന ഇലക്ട്രോ മാഗ്നറ്റിക് തരംഗങ്ങളുടെ വ്യതിയാനത്തിൽ നിന്നാണ് ഇത്തരം മാപിനികൾ തൊട്ടടുത്ത വസ്തുക്കളെ തിരിച്ചറിയുന്നത് . ഇതേ സംവിധാനം തന്നെയാണ് കാർ പിറകിലേക്ക് എടുക്കുമ്പോൾ നിങ്ങൾക്ക് മുന്നറിയിപ്പ് നൽകുന്നത് . തെറമിൻ ഉപകരണത്തിൽ അത് വായിക്കുന്ന ആളിന്റെ കരങ്ങളുടെ നീക്കം തിരിച്ചറിയുവാൻ രണ്ട് ആന്റീനകളാണ് ഉള്ളത് . ഒന്ന് ലംബമായും മറ്റൊന്ന് തിരശ്ചീനമായും ഘടിപ്പിച്ചിരിക്കും . സാധാരണ വലം കൈയുടെ നീക്കത്താൽ ശബ്ദത്തിന്റെ ആവൃതിയും ( പിച്ച് ) , ഇടത് കരത്തിന്റെ അനക്കത്താൽ വോളിയവും നിയന്ത്രിക്കാനാവും . ചില ഉപകരണങ്ങളിൽ ഇത് തിരിച്ചും ആകാറുണ്ട് . ഇങ്ങനെയുണ്ടാവുന്ന ഇലക്ട്രിക് സിഗ്നലുകൾ ആംപ്ലിഫൈ ചെയ്താണ് സ്പീക്കറുകളിൽ എത്തിക്കുന്നത് . ഒട്ടനവധി ഇംഗ്ലീഷ് , റഷ്യൻ സിനിമകളുടെ പശ്ചാത്തല സംഗീതമൊരുക്കുവാനും എണ്ണമറ്റ ടിവി ഷോകളിലെ തിം മ്യൂസിക്കുകൾ ഒരുക്കുവാനും തെറമിൻ ഉപയോഗിച്ചിട്ടുണ്ട് . 1956 ലെ De Mille ചിത്രമായ The Ten Commandments ൽ തെറമിൻ വ്യാപകമായി ഉപയോഗിച്ചിട്ടുണ്ട് . 1993 ൽ പുറത്തിറക്കിയ Theremin ; An Electric Odyssey എന്ന ഡോക്യുമെന്ററി ഈ ഉപകരണത്തിന് നമ്മുടെ കാലത്തും ആരാധകരെ നേടിക്കൊടുത്തിട്ടുണ്ട് .

ഇനി ഇതൊക്കെയവിടെ നിൽക്കട്ടെ . ഇവർ അല്ലെങ്കിൽ റ്റീൻ എയ്ജ് മെസ്സേജ് (TAM) അയച്ച സന്ദേശങ്ങൾ ഈ നക്ഷത്രങ്ങളിൽ ചെന്നോ ? അവയ്ക്കെന്തെങ്കിലും മറുപടി ലഭിച്ചോ എന്നൊക്കെ അറിയേണ്ടേ ? എങ്കിൽ കേട്ടോളൂ 2001 സെപ്റ്റംബർ മൂന്നിന് ഇവർ സപ്തർഷി മണ്ഡലത്തിലേക്ക് അയച്ച സന്ദേശം അവിടെച്ചെല്ലുന്നത് ജൂലൈ 2047 ൽ മാത്രമാണ് . ബാക്കിയുള്ളതൊക്കെ അതിനും വർഷങ്ങൾക്ക് ശേഷവും ! നമ്മുക്ക് കാത്തിരിക്കാം !

ലിയോൺ തെറമിൻ തന്നെ ഈ ഉപകരണത്തെപ്പറ്റി വിവരിക്കുന്നതും വായിക്കുന്നതും ഈ ലിങ്കിൽ കാണാം >>> https://youtu.be/w5qf9O6c20o

റ്റീൻ എയ്ജ് മെസ്സേജ് ബാഹ്യപ്രപഞ്ചത്തിലേക്ക് വിട്ട ആറ് തെറമിൻ മെലഡികൾ ഈ ലിങ്കിൽ ഉണ്ട് (https://sites.google.com/site/messagingtoeti/Home/theremin-s-melodies) . പക്ഷെ അത് കേട്ടാൽ അന്യഗ്രഹജീവികൾ ഇങ്ങോട്ട് വിട്ട മെലഡിയാണോ എന്ന് തോന്നിപ്പോകും 😀 (ബിഥൊവൻ ക്ഷമിക്കുക)

Image via Wikimedia Commons

🛑 You are not allowed to use this text content for YouTube Videos without permission 🛑

MORE POSTS

This website uses cookies to improve your experience. We'll assume you're ok with this, but you can opt-out if you wish. Accept Read More