സ്പാനിഷ്- പോർച്ചുഗീസ് പര്യവേക്ഷണങ്ങൾ കൊടുമ്പിരിക്കൊണ്ട കാലം. സ്വർണ്ണനഗരമായ എൽ ഡോറഡോ തേടി ഒരു സ്പാനിഷ് സംഘവും പര്യവേക്ഷണത്തിനു പുറപ്പെട്ടു. സാഹസികതയും ദുരൂഹതയും ആകാംക്ഷയും നിറഞ്ഞ ഒരു യാത്രയായിരുന്നു അത്. ആ യാത്രയ്ക്കിടയിൽ ഒരിടത്ത്, സ്ത്രീകൾ തങ്ങൾക്കെതിരേ പോർമുഖത്ത് അണിനിരന്നതുകണ്ട സ്പാനിഷ് സംഘം ആശ്ചര്യഭരിതരായി. ഗ്രീക്ക് പുരാണങ്ങളിൽ പരാമർശിച്ചിട്ടുള്ള ആമസോൺ പോരാളികളോ ഇവർ എന്ന് സ്പാനിഷുകാർ അദ്ഭുതംകൂറി. അങ്ങനെ, തങ്ങൾ മാസങ്ങളായി സഞ്ചരിച്ചുകൊണ്ടിരിക്കുന്ന മഹാനദിക്ക് അവർ പേരിട്ടു: ആമസോൺ.

ബാർബറി സിംഹങ്ങൾ എന്നറിയപ്പെടുന്ന അറ്റ്ലസ് ലയൺസ് അസാമാന്യ വലിപ്പമുള്ള സിംഹങ്ങളുടെ ഒരു കൂട്ടമായിരുന്നു. എന്നാൽ വടക്കൻ ആഫ്രിക്കയിലെ നാടോടിവർഗ്ഗങ്ങളുടെ നിലനിൽപ്പിന് തന്നെ അവ ഭീഷണിയായപ്പോൾ അവയെ കൊല്ലുവാൻ അവർ സകലവിധ മാർഗ്ഗങ്ങളും പ്രയോഗിച്ചു തുടങ്ങി. അവസാനം ജൂൾ ജെറാർഡ് എന്നൊരു ഫ്രഞ്ച് പട്ടാളക്കാരൻകൂടി രംഗത്ത് ഇറങ്ങിയതോടെ ബാർബറി സിംഹങ്ങളുടെ മരണമണി മുഴങ്ങി. ഇത് അറ്റ്ലസ് സിംഹങ്ങളുടെ ചരിത്രമാണ്. കൂട്ടത്തിൽ ജൂൾ ജെറാർഡ് എന്ന വേട്ടക്കാരന്റെ ജീവിതകഥകൂടിയാണിത്.

കടൽ യാത്രയെക്കുറിച്ചുള്ള സുന്ദരസ്വപ്നങ്ങളും മനസിലേറ്റി റോബർട്ട് ഡ്രൂറി എന്ന പതിമൂന്നുകാരൻ ഇന്ത്യയിലേക്കുള്ള ഒരു കപ്പലിൽ യാത്രതിരിച്ചു. കിനാവുകളിലെ അലയാഴിയും താൻ യാത്രചെയ്യുന്ന ഇന്ത്യൻ മഹാസമുദ്രവും തമ്മിൽ യാതൊരു ബന്ധവുമില്ലെന്ന് കപ്പലിൽ കയറിയ നിമിഷം തന്നെ അവൻ തിരിച്ചറിഞ്ഞു. ബംഗാൾ തീരങ്ങളിലെ ജീവിതാനുഭവങ്ങളുംപേറി തിരികെ നാട്ടിലേയ്ക്ക് യാത്ര തിരിച്ച ഡ്രൂറി പക്ഷെ ചെന്നെത്തിയത് താൻ വായിച്ചുപോലും അറിഞ്ഞിട്ടില്ലാത്ത മറ്റൊരു വിചിത്രലോകത്തായിരുന്നു ! കിരാതന്മാരായ കാപ്പിരി നാട്ടുരാജാക്കന്മാർ ഭരിക്കുന്ന മഡഗാസ്കർ എന്ന കൂറ്റൻ ദ്വീപ്! ജീവൻ നിലനിർത്തുവാനുള്ള അതിരൂക്ഷമായ യുദ്ധത്തിനൊടുവിൽ കൂടെയുള്ളവർ ഓരോന്നായി കൊഴിഞ്ഞു വീണപ്പോളും വിധി അവനെ ബാക്കി വച്ചു.